Биздин шаар жаңы жашоого умтулуу менен жигердүү өнүгүүдө. Эркин ишкердик шартында шаар тездик менен өзгөрүп, заман талабына ылайык жаңыланууда. Шаардын жалпы аймагы 1040 чарчы километрди түзөт.

Кемин шаары Чүй өрөөнүнүн чыгыш бөлүгүндө жайгашкан, борбор калаадан 100 чакырым аралыкта орун алган. Шаардын курамына бир микрорайон жана 48 көчө кирет, алардын бардыгы асфальтталган жолдор менен камсыздалган.

Алардын ичинен Бишкек – Нарын – Торугарт эл аралык маанидеги унаа жолу өтөт, анын шаар аймагындагы узундугу 3 чакырымды түзөт. Калган жолдор ички маанидеги асфальтталган көчөлөр болуп, көчө жарыктары менен жабдылган. Жолдордун жалпы узундугу 120 чакырым. Ички жолдордун ичинен 4 негизги көчө бар, ар биринин узундугу 2 чакырымдан.

Шаардын инфраструктурасы ыкчам өнүгүүдө. Жеке жана мамлекеттик менчиктеги бир катар ишканалар, уюлдук байланыш операторлору жана интернет-провайдерлер туруктуу иш алып барышат. Банкттык система 6 банкты жана 3 микрокредиттик компанияны камтыйт.

Шаар аймагында мунай иштетүүчү завод, металл буюмдарын чыгаруучу ишканалар, тигүү цехтери, наабайканалар, кант кызылчасын кабыл алуу пункттары жана башка көптөгөн чакан өндүрүштөр жайгашкан.

Улуу Жибек жолунун (азыркы А365 унаа жолу) боюнда жайгашкандыгына байланыштуу шаарда соода жана тейлөө кызматтары, кафе жана ресторандар кеңири өнүккөн.

Ошондой эле шаар аркылуу Бишкек – Балыкчы темир жолу өтүп, темир жол бекети иштеп турат.